Хэнтий нутагт 2 дахь удаагаа зохион байгуулагдаж байгаа Орос хэл, бүсийн арга хэмжээ нь Монголоос ОХУ-д оюутан сургаж эхэлсний 95 жилийн ой болон Монгол-Оросын найрамдлын өдрүүдийн хүрээнд болж байгаагаараа онцлог юм.

Энэхүү бүсийн арга хэмжээнд Аймгийн иргэдийн Төлөөлөгчдийн Хурлын дарга Л.Батсайхан, Монгол дахь найрамдлын нийгэмлэгүүдийн эвлэлийн Монголын эвлэлийн дэд тэргүүн, МУ-ын гавъяат багш Д.Цогзолмаа, ОХУ-аас Монголд суугаа элчин сайдын яамны зөвлөх, Оросын Шинжлэх ухаан, Соёлын төвийн захирал Михайлов Евгений Георгиевич, Оросын Шинжлэх ухаан, Соёлын төвийн референт-орчуулагч Зимирёв Владимир Сергеевич, Г.В.Плехановын нэрэмжит ОЭЗИС-ийн Улаанбаатар дахь салбарын багш, хэл бичгийн ухааны доктор Зандаков Сергей Ильич нар оролцож үг хэлэв.

Аймгийн иргэдийн Төлөөлөгчдийн Хурлын дарга Л.Батсайхан нээж хэлсэн үгэндээ: “Энэхүү арга хэмжээний үеэр зохион байгуулагдах Орос хэлний олимпиад нь багш, сурагчдын авъяас ур чадварыг нээн хөгжүүлж, сурагчдад ОХУ-д тэтгэлгээр суралцах боломж олгож, багш нарт ОХУ-д үнэ төлбөргүй мэдлэг, ур чадвараа дээшлүүлэх боломж олгодог билээ. 2016 онд Дорнод аймагт болсон энэхүү олимпиадад манай аймгаас 3 сурагч ОХУ-ын их дээд сургуульд үнэ төлбөргүй сурах эрх авч одоогоор ОХУ-д амжилттай суралцаж байна.” Хэмээн олимпиадад оюун ухаанаа сорихоор ирсэн багш сурган хүмүүжүүлэгч, сурагчдад амжилт хүсэв.