Аймгийн иргэдийн Төлөөлөгчдийн Хурлын Тэргүүлэгчид 2018 оны 6-р сарын 29-ний өдөр хуралдаж, 3 асуудал хэлэлцэж шийдвэрлэлээ.

Хайгуулын тусгай зөвшөөрлийг дэмжих эсэх тухай, Мал мах бэлтгэх гарал үүслийн гэрчилгээ олгох журмын тогтоол хүчингүйд тооцох тухай, Аудитын сэдвийн санал хүргүүлэх тухай асуудлуудыг Тэргүүлэгчид хэлэлцлээ.

-Ашигт малтмал, газрын тосны газраас Хэнтий аймгийн Батноров, Жаргалтхаан, Өмнөдэлгэр зэрэг сумдад хайгуулын тусгай зөвшөөрөл олгох хүсэлт ирсний дагуу эдгээр сумдад судалгаа хийснээр өвөлжөө хаваржааны газар болон орон нутгийн тусгай хэрэгцээний газар давхацсан учир хайгуулын тусгай зөвшөөрөл өгөх боломжгүй гэсэн саналыг дэмжүүлэхээр ХОХБТХ-ээс оруулсныг кадастрын зурагтайгаа нарийн тооцоололтойгоор үзэж шийдвэр гаргахаар болов.

-Захиргааны Ерөнхий хууль 2017 оны 7-р сарын 1, Мал амьтны эрүүл мэндийн тухай хууль 2018 оны 6-р сарын 1-ний өдрөөс хэрэгжиж эхэлсэнтэй холбогдуулан журмыг хуульд нийцүүлэх шаардлагатай талаар Цагдаагийн ерөнхий газар, Мэргэжлийн хяналтын ерөнхий газар болон Аймгийн Мэргэжлийн хяналтын газраас ирүүлсэн шаардлагын дагуу “Мал мах бэлтгэх гарал үүслийн гэрчилгээ олгох, хэрэглэх, зарцуулах журам”-ын хэрэгжилтийг 2018 оны 7-р сарын 1-ний өдрөөс эхлэн хүчингүй болголоо.