Өнөөдөр /2018.10.26/ Сонгинохайрхан дүүргийн иргэдийн Төлөөлөгчдийн Хурлын Намын бүлгийн дарга Д.Батболдоор ахлуулсан Төлөөлөгчид, ажлын албаны бүрэлдэхүүн бүхий дүүргийн удирдах түвшний 11 албан хаагч Хэнтий аймагт албан айлчлал хийлээ.

Аймгийн иргэдийн Төлөөлөгчдийн Хурлын дарга Л.Батсайхан, аймгийн Засаг даргын орлогч, Хурлын төлөөлөгч, Тэргүүлэгч Г.Хэрлэнчулуун, Ц.Чогсомжав нар болон аймгийн хурлын Төлөөлөгчид оролцсон ажил хэргийн уулзалтын зорилго нь 2016 оны 9 дүгээр сард эхлүүлсэн аймаг, дүүргийн ажил хэргийн хамтын ажиллагааг бодит ажил болгох, нутгийн өөрөө удирдах байгууллагын бодлого, үйл ажиллагааны талаар санал солилцож туршлага, мэдээллээ хуваалцах байлаа.

Энэ уулзалтын үеэр Чингис хотын ерөнхий төлөвлөлттэй танилцаж, харилцан туслах, дэмжих асуудлын талаар ярилцаж, хурал хоорондын ажлын сайн туршлагаа харилцан солилцох, Төлөөлөгчдийн ажиллах орчин, бодлогын хороодын хамтын ажиллагааг өргөжүүлэх хамтын ажиллагааны санамж бичигт гарын үсэг зурлаа.

Сонгинохайрхан дүүрэг нийслэлийн хамгийн их хүн ам, газар нутаг бүхий томоохон дүүрэг бөгөөд Хэнтий аймгийн иргэд Монгол Улсын Их хуралд гишүүдээр сонгогдож, дүүргийн Хурлын удирдлагын түвшинд ч ажиллаж байгаа билээ.

                                  АЙМГИЙН ИРГЭДИЙН ТӨЛӨӨЛӨГЧДИЙН ХУРАЛ