Аймгийн иргэдийн Төлөөлөгчдийн Хурлын дарга Л.Батсайхан 5 дугаар сарын 31-ний өдөр Галшар суманд ажиллав. "Төлөөлөгчийн өдөр"-ийг тогтоох тухай Тэргүүлэгчдийн 2016 оны 16 дугаар тогтоолын дагуу Төлөөлөгчдийг сумдын иргэдийн Төлөөлөгчдийн Хуралтай хамтран зохион байгуулах чиглэл өгсөн боловч сумд харилцан адилгүй түвшинд хийж ирсэн тул 2019 онд аймгийн Хурлын ажлын албанаас бүх сумдад Төлөөлөгчдийн өдөр зохион байгуулж, орон нутагт ажиллахаар шийдвэрлэсэн юм.
Энэ удаа Галшар сумаас аймгийн иргэдийн Төлөөлөгчдийн Хуралд Төлөөлөгчөөр сонгогдсон Б.Энхтайван төлөөлөгчдийн өдрийг зохион байгуулав. Төлөөлөгчийн өдрийн хүрээнд Төлөөлөгч Б.Энхтайван ажлын тайлангаа тавьж, тодорхой асуудлуудаар иргэд байгууллагуудын саналыг сонсов. Төлөөлөгч Б.Энхтайван дууны тэмцээн, хүүхдийн үндэсний бөхийн барилдаан зэргийг төлөвлөгөөтэйгээр зохион байгуулсан бөгөөд энэ өдөр тамхины хор хөнөөлийн тухай сургалт хийлээ. Төрийн дээд шагнал, аймгийн Хурлын шагналаар шагнагдсан иргэдийн шагналыг мөн гардуулав.
6 дугаар сард Дадал, Дархан, Баян-Овоо сумдаас сонгогдсон Төлөөлөгчийн өдөр болно.
