Хэнтий аймгийн иргэдийн Төлөөлөгчдийн Тэргүүлэгчдийн 2016 оны “Төлөөлөгчийн өдөр бий болгох” тухай тогтоолын хэрэгжилтийг хангах зорилгоор аймгийн иргэдийн Төлөөлөгчдийн Хурлын 39 Төлөөлөгч 2019 онд ажлын тайлангаа иргэддээ танилцуулах тайлант өдөрлөг “Төлөөлөгчдийн өдөр”-ийг зохион байгуулж байгаа билээ.

Энэ удаа 9 дэх сум буюу Баянмөнх суманд аймгийн иргэдийн Төлөөлөгчдийн Хурлын Төлөөлөгч Мижидийн Цэнгэл, сумын иргэдийн Төлөөлөгчдийн Хуралд сонгогдсон Төлөөлөгчдийн хамтаар хийсэн ажлаа тайлагнаж, “Төлөөлөгчийн өдөр”-өө зохион байгуулж, иргэдтэйгээ нэгэн өдрийг хамтдаа өнгөрүүллээ.

Тайлант өдөрлөгийн үеэр аймаг, сумын хуралд сонгогдсон Төлөөлөгчид урлагын тоглолт үзүүлж, иргэддээ хүндэтгэл үзүүлж, хос дуучдын тэмцээнийг зохион байгуулан явууллаа. Мөн сумын иргэд болон ерөнхий боловсролын сургуулийн сурагчдад олноо Чилла нэрээр алдаршсан Лектор Бандицэрэн “Харах өнцгөө өөрчлөе” сэдвээр лекц тавьсан юм.  

Мөн энэ үеэр Орон нутгийн хөгжлийн сангийн хөрөнгөөр бүтээн байгуулсан “Залуус төгөл” цэцэрлэгт хүрээлэн, “Эгшигт Хэрлэн” дууны хөшөөний нээлт болсон юм.

Сумынхаа хөгжил дэвшлийн бодлогыг тодорхойлж, иргэдийнхээ итгэл, сэтгэлийг хүлээн сонгогдсон сумын иргэдийн төлөөлөгчдийн хурлын дарга Б.Алтантуяа, сумынхаа хуралд 6 удаа сонгогдсон ахмад багш О.Цэрэннадмид нарыг “Хурлын Тэргүүний Төлөөлөгч” тэмдгээр, сумын хурлын төлөөлөгч Э.Бат-Эрдэнийг  “Сүлд” тэмдгээр тус тус шагнасныг аймгийн иргэдийн Төлөөлөгчдийн Хурлын дарга Л.Батсайхан гардуулав. 

9 дүгээр сарын 25-ны өдрөөс Хэрлэн сумын төвийн багуудад “Төлөөлөгчийн өдөр” үргэлжилнэ.