Эрдэнэбүрэн сумын Баянгол багийн малчин Я.Өлгийсайхан, Ц.Ганчимэг нар 1991 онд гэр бүл болж, 28 жил мал малласан удам дагасан малчид юм. 2005 онд “Сумын аварга малчин”, 2009 онд “Аймгийн аварга малчин”, 2017 онд “Аймгийн хошой аварга малчин”-аар шалгарч байсан бол 2020 онд “Монгол улсын Аварга малчин”-аар шалгарсныг аймгийн ИТХ-ын дарга Г.Пүрэвгандиар ахлуулсан ажлын хэсэг гардуулан өгч баяр хүргэлээ.
Улсын аварга малчин Я.Өлгийсайхан, Ц.Ганчимэг нар 2005 оноос эхлэн 1000-с дээш тооны мал тоолуулж, малынхаа тоонд бус чанарт нь анхаарч залуу малчдад мал маллах арга ухааныг зааж сурган, өвөл, хаврын улиралд туслах малчидтайгаа хамтран малаа 5 төрөл дээр нь өсгөж, 4-5 малчныг 120-300 хүртэлх толгой малаар малжуулж, цалинжуулдаг байна.
Малынхаа үүлдэр угсааг сайжруулахын тулд Дорнод аймгийн Үзэмчин хуцаар хонин сүргээ, Увс аймгийн Өлгий сумын Улаан ухнаар ямаан сүргээ, Төв аймгийн Эрдэнэ сумын Азаргаар адуун сүргийнхээ үүлдэр угсааг сайжруулж яваа туршлагатай малчид юм.
Я.Өлгийсайхан хэлэхдээ: Би сургуулиа төгсөөд л аав ээжтэйгээ мал малласан. Аав минь хэлэхдээ малчин хүн алдаж болно, алдсанаа давтаж болохгүй тэвчээртэй байгаарай гэж захидаг байсан.
Я.Өлгийсайхан, Ц.Ганчимэг нар багийнхаа 3 дахь “Монгол Улсын Аварга Малчин”-аар тодорч 12 жилийн дараа Баянгол баг ийнхүү улсын аварга малчнаа өлгийдөн авч байна.
