УИХ-ын гишүүн Ц.Идэрбатын санаачилгаар УИХ-ын Байгаль орчин, хүнс, хөдөө аж ахуйн байнгын хороо, Барилга, хот байгуулалтын яам, Газар зохион байгуулалт, геодези, зураг зүйн газар, Хэнтий аймгийн ЗДТГ-аас зохион байгуулж буй ГАЗРЫН БАГЦ ХУУЛИЙН ТӨСЛИЙН НЭЭЛТТЭЙ ХЭЛЭЛЦҮҮЛЭГ Хэнтий аймагт боллоо.Хэлэлцүүлэгт Хэнтий аймгийн ИТХ-ын дарга Г.Хэрлэнчулуун, Засаг дарга Ц.Чогсомжав, Барилга, хот байгуулалтын яамны Төрийн нарийн бичгийн дарга С.Магнайсүрэн, Газар зохион байгуулалт, геодези, зураг зүйн газрын даргын үүргийг түр орлон гүйцэтгэгч Ж.Батсайхан, УИХ-ын БОХХАА-ын байнгын хорооны ахлах зөвлөх Ш.Ариунжаргал нарын албаныхан, Хэнтий аймгийн 18 сум, 4 тосгоны Засаг дарга, ИТХ-ын дарга нар, 89 багийн Засаг дарга нар, малчид, иргэдийн төлөөлөл хүнсний ногоочид, тариаланчдыг хамруулсан 400 гаруй хүн оролцлоо.Газрын тухай хуулийг 2002 оны зургаадугаар сарын 07-ны өдөр 7 бүлэг, 64 зүйлтэйгээр баталсанаас хойш өдийг хүртэлх хугацаанд нийт 32 удаа нэмэлт, өөрчлөлт оруулсан. Энэ нь тус хуульд 7 давхардал, 29 зөрчил, 25 хийдэл үүсгэсэн тухай Хууль, эрх зүйн яамнаас хийсэн дүн шинжилгээгээр илэрсэн байна. Мөн одоо хэрэгжиж байгаа Газрын тухай хууль нь газартай холбоотой олон талт асуудлуудыг зохицуулах чадамжгүйд хүрч байгаа учраас илүү боловсронгуй болгох, энэ салбарт шаардагдаж байгаа зохицуулалтуудыг хуулийн төсөлд шинээр оруулах, өөрчлөх шаардлага үүсчээ.Тиймээс Газрын багц хуулийн төсөлд, Монгол Улсын газар нутаг салшгүй бүрэн бүтэн байх, газрын сан нэгдмэл байх, газар нь төрийн хамгаалалтад байх, хүн амын эрүүл мэнд, байгаль хамгаалал, үндэсний аюулгүй байдалд харшлах аливаа үйл ажиллагаа явуулахгүй байх, газрыг хуульд заасан нөхцөл, журмын дагуу ашиглах, хамгаалах, нөхөн сэргээх, учруулсан хохирлыг нөхөн төлүүлэх, гэм хорыг арилгуулах, газрын талаарх мэдээлэл ил тод, нээлттэй байх зэрэг үндсэн зарчмуудыг бүх түвшинд баримталж ажиллахаар тусгасан байна.
