Боловсролын байгууллагуудын багш нарын ажлын бүтээмжийг дээшлүүлэх, тогтвор суурьшилтай ажиллуулах, цаашилбал аймаг орон нутгийн боловсролын салбарт ахиц амжилт гаргах зорилготой аймгийн Засаг даргын нэрэмжит "Шилдэг багш" болзолт уралдаан зарлагдсан.Уралдаан 9 дүгээр сарын 1-ээс эхлэн 3 үе шаттайгаар, 3 сарын турш үргэлжлэх бөгөөд 1 дүгээр нь шат нь 9 дүгээр сарын 30-нд дуусах байсан юм. Тэгвэл багш нарын боловсролын гүйцэтгэлийн үнэлгээ оройтож гарсантай холбогдуулан 1 дүгээр шатны шалгаруулалт 10 дугаар сарын 20-ны өдрийг хүртэл сунгалаа. Үүнд Ерөнхий боловсролын сургууль, цэцэрлэгийн үндсэн багшаар ажиллаж байгаа “Нийтлэг шаардлага”-ыг хангасан багш нар оролцох эрхтэй бөгөөд эхний шалгаруулалтыг тухайн сургууль, цэцэрлэг дээрээ явуулж, 10 дугаар сарын 20-нд БШУГ-т хүргүүлнэ.2 дугаар шат 11 сарын 15 хүртэл үргэлжлэх бөгөөд 1 дүгээр шатнаас шалгарсан багш нар “Миний ажлын менежмент” сэдвээр илтгэл бэлтгэж оролцоно. 3 дугаар шатанд Улаанбаатар хотоос зөвлөх багш, мэргэжлийн байгууллагын төлөөллүүд оролцсон баг мэргэжил ур чадварын шалгалт авч 12 дугаар сарын 20-ны дотор дүнгээ гаргана. Ингээд эхний 5 багшид 5,0-25,0 сая төгрөгийн мөнгөн дэмжлэг үзүүлэх юм.Тиймээс багш сурган хүмүүжүүлэгчид та бүхэн энэхүү уралдаанд идэвхтэй оролцож, өөрийн ур чадвараа бодитоор үнэлүүлээрэй.