ГАДААД ХЭЛНИЙ БОЛОВСРОЛЫГ ОРОН НУТАГТ ХӨГЖҮҮЛЖ БУЙ "GREEN FIELD" АКАДЕМИЙН ЗАХИРАЛ Д.АЗЗАЯАГ ХҮЛЭЭН АВЧ УУЛЗЛАА.
Хэнтий аймаг аймгийн иргэдийн Төлөөлөгчдийн Хурлын дарга Б.Цогт-Орших “Green Field” академийн захирал Д.Аззаяаг хүлээн авч уулзлаа. Тус академи нь Англи, Хятад, Солонгос хэлний сургалтыг орон нутагт чанартай, шаталсан хэлбэрээр явуулж, олон улсын хөтөлбөрүүдийг амжилттай хэрэгжүүлж буй юм.Уулзалтын үеэр захирал Д.Аззаяа академийн үйл ажиллагааны явц, ололт амжилт болон ирээдүйн зорилтоо танилцуулсан байна. Одоогоор академид 19 ангийн 160 гаруй сурагч суралцаж, амжилттай төгсөж байгаа нь тус сургалтын төвийн үр дүнтэй, чанартай сургалтын хөтөлбөрийг илтгэж байна.“Green Field” академи нь 2024-2025 оны хичээлийн жилд Оксфордын англи хэлний олон улсын хөтөлбөрийг хэрэгжүүлж эхэлсэн бөгөөд цаашид 4 настнуудад зориулсан боловсролын шинэ хөтөлбөр нэвтрүүлэхээр ажиллаж байна. Түүнчлэн Япон улсын боловсролын байгууллагуудтай хамтын ажиллагааны эхлэлийг тавьсан нь сургалтын чанарыг шинэ түвшинд хүргэхэд чухал алхам болж байгаа юм.“Бид орон нутгийн хүүхдүүдийг дэлхийн боловсролд ойртуулах зорилгоор олон улсын туршлагыг нэвтрүүлж, хэлний боловсролын чанарыг тасралтгүй сайжруулахаар хичээн ажиллаж байна” хэмээн Д.Аззаяа онцоллоо.Б.Цогт-Орших академийн үйл ажиллагааг дэмжиж, орон нутагт гадаад хэлний боловсролын хүртээмжийг нэмэгдүүлэх, ирээдүйд олон улсын түвшинд өрсөлдөх чадвартай иргэдийг төлөвшүүлэхэд хамтран ажиллахаа илэрхийллээ.АЙМГИЙН ИРГЭДИЙН ТӨЛӨӨЛӨГЧДИЙН ХУРЛЫН АЖЛЫН АЛБА