ГЭМТ ХЭРГЭЭС УРЬДЧИЛАН СЭРГИЙЛЭХ АЖЛЫГ ЗОХИЦУУЛАХ САЛБАР ЗӨВЛӨЛИЙН УРД БҮСИЙН ЗӨВЛӨГӨӨН ДАРХАН СУМАНД БОЛНО
Монгол Улсад Гэмт хэргээс урьдчилан сэргийлэх ажлыг зохицуулах зөвлөл байгуулагдсаны 60 жилийн ой тохиож буйтай холбогдуулан, Хэнтий аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн 2025 оны үйл ажиллагааны төлөвлөгөөний дагуу урд бүсийн зөвлөгөөн 2025 оны 7 дугаар сарын 1-ний өдөр Дархан суманд зохион байгуулагдана.
Зөвлөгөөний хүрээнд Хэнтий аймгийн Иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Б.Цогт-Оршихоор ахлуулсан ажлын хэсэг Дархан суманд ажиллаж, Баянхутаг, Галшар, Бор-Өндөр, Баянмөнх сумдын Гэмт хэргээс урьдчилан сэргийлэх ажлыг зохицуулах салбар зөвлөлийн дарга, дэд дарга, гишүүд, малчид, иргэдийн төлөөлөл оролцоно.
Зөвлөгөөнд хууль хяналтын байгууллагууд оролцож, иргэдэд газар дээр нь үйлчилгээ үзүүлнэ. Үүнд:
Аймгийн Шүүх – Нэхэмжлэл хүлээн авах болон эвлэрүүлэн зуучлах ажиллагааны талаар мэдээлэл өгнө. Прокурорын газар – Гэмт хэрэг, зөрчилтэй холбоотой прокурорын шийдвэрийн талаар, мөн байгаль хамгаалах чиглэлээр авч хэрэгжүүлж буй арга хэмжээний талаар мэдээлнэ. Цагдаагийн газар – Иргэдийн аюулгүй байдал, эрх хамгаалалттай холбоотой мэдээлэл түгээнэ. Шүүхийн шийдвэр гүйцэтгэх газар – Иргэний болон хорихоос өөр төрлийн ял эдлүүлэх ажиллагааны талаар мэдээлэл, зөвлөгөө өгнө.Мөн иргэдийн өргөдөл, гомдол, санал хүсэлтийг газар дээр нь хүлээн авч шийдвэрлэх чиглэлээр ажиллаж, хууль зүйн зөвлөгөө, мэдээлэл өгч ажиллана.
Дархан сумын иргэд хөдөлмөрч та бүхнийг өргөнөөр оролцохыг урьж байна.
Аймгийн иргэдийн Төлөөлөгчдийн Хурлын ажлын алба