“Аймгийн түвшинд ОНОН ГОЛЫН АСУУДЛЫГ хэлэлцүүлэх нь” уулзалт хэлэлцүүлэг Иргэний танхимд зохион байгуулагдлаа. Дэлхийн байгаль хамгаалах сан, Байгаль орчны хуульчдын холбоо,Онон, Улз голынхон ТББ зохион байгуулж, Хэнтий аймгийн ИТХ-ын Хөдөө аж ахуй, Аялал жуулчлал, Байгаль орчны хороо, сумдын ИТХ, Аймгийн БОАЖГ зэрэг байгууллагууд хамтран зохион байгуулав.

Онон голын эх болох Биндэр, Батширээт сумдын нутагт байрлах Гутайн даваанд олгогдсон уул уурхайн тусгай зөвшөөрлүүд, хууль бус олборлолтын талаарх үнэн бодит мэдээллийг иргэдэд хүргэж саналыг Аймгийн шийдвэр гаргах түвшинд хэлэлцүүлэн бодлогын зөвлөмж, саналыг УИХ болон Засгийн газарт хүргүүлэх зорилготойгоор зохион байгууллаа.

Энэхүү хэлэлцүүлэгт аймгийн шийдвэр гаргах түвшний байгууллагууд оролцож санал бодлоо солилцсон юм. Аймгийн Засаг даргын хувьд уг Гутайн даваанд олгогдсон уул уурхайн тусгай зөвшөөрөл, хууль бус олборлолтын тал дээр аймгийн байр суурь гэж авч үзээд Төр засаг болон УИХ-ийн хэмжээнд бид хамтраад тулах нь зүйтэй гэсэн саналыг гаргалаа.

Энэ үеэр санал нэгтгэх ажлын хэсгийг байгуулав. Уг ажлын хэсгийн ахлагчаар АИТХ-ын ХАААЖБОХорооны дарга Б.Дархантөр, нарийн бичгийн даргаар Аймгийн ИТХ-ын Ажлын албаны ажилтан Т.Алтанчимэг, гишүүдээр “Онон Улз голынхон” ТББ Л.Отгонцэцэг, Аймгийн БОАЖГ-ын дарга Г.Энхбаяр, Аймгийн БОАЖГ-ын мэргэжилтэн Г.Мөнх-Эрдэнэ, АЗДТГ-ын Хөрөнгө Оруулалт, Хөгжлийн Бодлого Төлөвлөлтийн Хэлтсийн дарга Э.Мөнх-Эрдэнэ, “Хэрлэн тоонот Эко” Төрийн бус байгууллагын О.Баттогтох нарын бүрэлдэхүүнтэйгээр байгуулагдлаа.