НҮБ-ын Хөгжлийн хөтөлбөрийн Ази-Номхон далайн бүсийн захирал ноён Хаолян Шу, НҮБ-ын суурин Зохицуулагч, НҮБ-ын Хөгжлийн хөтөлбөрийн Монгол дахь суурин төлөөлөгч Хатагтай Биата Транкман нар 2017 оны 02 дугаар сарын 23-24-ний өдрүүдэд Хэнтий аймагт ажлын айлчлал хийх гэж байна. Манай аймгийн тухайд НҮБ-аас нилээдгүй төслийн дэмжлэг аван нутаг орноо хөгжүүлж байгаа. Тэгвэл энэхүү айлчлалын гол зорилго нь НҮБХХ-өөс манай аймагт дэмжин хэрэгжүүлж байгаа үйл ажиллагаатай танилцах явдал юм.

2017 оны 02 дугаар сарын 23-ны өдрийн 16 цагт Жаргалтхаан сумын удирдлагуудтай уулзалт хийж, зудад нэрвэгдсэн өрх болон гамшгийн эрсдлийг бууруулах төслийн үр шимийг хүртэж байгаа 2 малчин өрхөөр зочлох юм.

Дараагийн өдөр нь Аймгийн ИТХ-ын ажлын албанд зочилж www.khentii.khural.mn сайтын үйл ажиллагаатай танилцах бөгөөд Аймгийн Засаг дарга Н.Ганбямба болон бусад албаны хүмүүстэй уулзалт хийх юм.

Ноён Хаолян Шу нь НҮБ-ын Ерөнхий нарийн бичгийн даргын Шадар туслах, НҮБ-ын Хөгжлийн Хөтөлбөрийн Захирагчийн орлогч бөгөөд Ази, номхон далайн бүсийн товчооны захирал. Ноён Хаолян Шу нь НҮБ-ын Хөгжлийн Хөтөлбөрт 1995 оноос Ази, номхон далайн бүс, Зүүн Европ ба Тусгаар улсуудын хамтын нөхөрлөлийн орнуудыг тус тус хариуцан ажиллаж эхэлсэн байна.

Хатагтай Биата Транкман бол НҮБХХ-ийн Монгол дахь суурин төлөөлөгчөөр 2015 оны 8 дугаар сараас томилогдон ажилласан. Тэрээр Монгол улсад ажиллахаас өмнө НҮБХХ-ийн Индонез дахь Суурин төлөөлөгчийн газар 2010-2015 онд Орон хариуцсан захирлаар, Шри ланка улсад 2005-2010 онд Орлогч суурин төлөөлөгчөөр, Камбожид Засаглалын багийн ахлагчаар 2002-2005 онуудад тус тус ажиллаж байжээ.