2016 оны УИХ болон орон нутгийн сонгуулийн үр дүнд бий болсон аймаг, сумын ИТХ-ын Төлөөлөгчдийн 30 хувь нь өмнө нь Төлөөлөгчөөр ажиллаж байсан туршлагатай байгаа бол үлдсэн 70 хувь нь шинээр сонгогдсон төлөөлөгчид. Тиймээс 2012-2016 онуудад амжилттай хэрэгжиж байсан энэхүү төслийг үргэлжүүлэхээр болжээ. Уг суурь сургалтыг аймгийн ИТХ-ын Төлөөлөгчдийн дунд явуулж байгаа бол ирэх 12 дугаар сард сумын ИТХ-ын төлөөлөгчдийг хамруулах юм. Сургалтыг аймгийн ИТХ-ын дарга Г.Эрдэнэбат нээж хэлсэн үгэндээ:-“Нутгийн өөрөө удирдах ёсны байгууллагын гол цөм болсон Төлөөлөгчдийг чадавхжуулснаар төр иргэний хамтын ажиллагааг өргөжүүлж “Иргэн” төвтэй төрийн тогтолцоог бэхжүүлэх ач холбогдолтой” хэмээн онцолж сургалтад оролцогчдод амжилт хүслээ. Хоёр өдөр үргэлжлэх уг сургалтаар төслийн сургагч багш Р.Тунгалаг-Эрдэнэ, Б.Эрдэнэцэцэг, А.Янжмаа, С.Цэгмид нар “Орон нутгийн төсөв санхүүгийн удирдлага”, “Иргэдийн оролцоо, иргэдтэй харилцах нь”, “Байгаль хамгаалал газрын харилцаа”, “Нутгийн өөрөө удирдах байгууллагын Үндсэн хуулийн ба эрх зүйн үндэс”, “Хуралдаан”, “Хуралдааны дэг” зэрэг сэдвээр явуулж байна.